Казакстандын ички иштер министри кыргызстандыкты сабаган Бейбут Шуменов кайда качышы мүмкүн экенин айтты

Коңшу Казакстандын ички иштер министри Марат Ахметжанов атактуу мушкер Бейбут Шуменовду издөө иштери боюнча комментарий берди.

Казакстан өкмөтүнүн бүгүнкү жыйынында журналисттер министрден Шуменовду издөө иштеринин жүрүшү тууралуу сурашты.

"Учурда тергөө амалдары жүрүп жатат, ал издөөдө. Биз мыйзамдын чегинде иштей беребиз. Ал АКШда болушу мүмкүн. Учурда өзүнчө көрсөтмөлөр жөнөтүлүп, керектүү тергөө амалдары жүргүзүлүүдө. Шуменовдуку орточо оордуктагы кылмыш, анда тараптардын жарашуусу каралган. Бул боюнча толук кандуу сотко чейинки тергөө иштери жүргүзүлүп, чечим чыгарылат", - деген Ахметжанов.

Эске салсак, 18-июнь күнү Астанадагы ири соода борборунда колунда баласы бар кишини бир адам сабап салган видео интернетте тараган. Социалдык тармактарда колунда баласы бар кишини сабаган адам бокс боюнча Дүйнө чемпиону Бейбут Шуменов экени айтылган. Мушкер кыргызстандык жаранды колунда баласы бар болгонуна карабастан чаап жиберген.