Орусия Украинага каршы согушу тууралуу окуучулардын тарых китебине киргизди

Орусияда Украинадагы согушту камтыган "жаңы тарых" китеби жарык көрдү. Бул тууралуу Крым.Реалии басылмасы жазып чыкты.

Маалым болгондой, 7-августта билим берүү министри Сергей Кравцов менен учурдагы Орусиянын президентинин жардамчысы Владимир Мединский мектеп окуучулары үчүн жаңы тарых китебинин бет ачарын өткөрүшкөн. Анда аталган китеп 1-сентябрдан тарта мектепте окутула баштай турганы айтылган.

Басылманын маалыматына караганда, 2-август күнү Кравцов Владимир Путин менен жолугушууда 11-класстын окуу китебинде эң маанилүү окуялар, анын ичинде Крым менен Севастополдун аннексияланышы, "атайын аскердик операциянын" тагыраагы, Украинага каршы согуштун себептери жана жүрүшү чагылдырылганын айткан.

Окуу китебинде 1970-жылдан 2000-жылга чейинки тарыхты толугу менен кайра жазылып , жалпы тарых бөлүмү кыскартылган. Анда Азия, Африка жана Латын Америкасы боюнча бөлүктөр кеңейтилген. Ал эми Украинадагы согуш боюнча китепте 17 пункт бар.

Белгилей кетсек, май айында "Сота" басылмасы 10-11-класстар үчүн орус тарыхы боюнча жаңы окуу китебиндеги Орусиянын Украинага басып киришине жана ага чейинки окуяларга арналган бөлүмдүн сүрөттөрүн жарыялаган.