Өлкөдө 7 миң мугалим окутуунун жаңы ыкмаларын өздөштүрүүдө

Башталгыч класстын 7 миң мугалими коррекциялык окутуунун ыкмалары боюнча тренингден өтүп жатат. Бул тууралуу Билим берүү жана илим министрлигинен билдиришти.

Кабарлангандай, окутуу Билим берүү министрлиги Дүйнөлүк банктын каржылык колдоосу менен ишке ашырып жаткан "Келечек үчүн билим берүү" долбоорунун алкагында жүрүүдө.

Ушул жылдын август айына карата Кыргызстан боюнча 1 200 пилоттук мектептин 4 миң 200 мугалими кадимки жана онлайн режимде тренингден өтүштү.

Долбоордун алкагында октябрь айында бала бакча тарбиячыларынын квалификациясын жогорулатуу пландалууда. Өлкө боюнча 700 бала бакчанын тарбиячылары «Балалык» мектепке чейинки өнүктүрүү программасы боюнча окутуудан өтөт.

Белгилей кетсек, "Келечек үчүн билим берүү" долбоорунун алкагында 58 миң мугалим үчүн түрдүү багыттар боюнча окутуу уюштурулат.