Жакында унааны онлайн режимде кайра каттоо боюнча пилоттук долбоор ишке кирет

Кыргызстанда 2023-жылдын 1-сентябрынан 2024-жылдын 1-сентябрына чейин унааны онлайн режимде кайра каттоо боюнча пилоттук долбоор ишке киргизилет. Бул тууралуу Ички иштер министрлигинен кабарлашты.

Маалым болгондой, долбоор ийгиликтүү ишке ашса, анда ал ишин андан ары уланта берет. Болгону унааларды онлайн кайра каттоо үчүн жарандардын жол кыймылынын эрежелерин бузгандыгы үчүн айыптар, туумдар жана салыктар боюнча карызы жок болушу шарт.

"Онлайн кайра каттоо үчүн автотранспорттун ээси автотранспорт каражатын визуалдык кароодон өткөрүп, "Унаа" мамлекеттик мекемесинин бөлүмдөрүндө сүрөткө тартып алышы керек, ал эми унааны кароодон өткөндүгү тууралуу маалымат электрондук базада 30 күн сакталат. Бул мөөнөттүн ичинде менчик ээси Кыргызстандын банктары жана "Түндүк" мамлекеттик порталы тарабынан иштелип чыккан тиешелүү тиркемелер боюнча электрондук цифралык кол тамга аркылуу онлайн түрдө кайра каттата алат", - деп айтылат маалыматта.

Белгилей кетсек, нике учурунда алынган транспорт каражатын кайра каттоодо жубайы дагы кайра каттоого макулдук берүү үчүн онлайн идентификациядан өтүшү керек.

Министрликтен билдиришкендей, унаанын алдыңкы эшиктердин каптал терезелерин караңгылатууга уруксат кагаздарына насыя берүү боюнча маселелер каралып жатат жана автотранспорт каражаттарынын алдыңкы эшиктеринин каптал айнектерин караңгылатууга уруксат кагазын онлайн режиминде алуу боюнча тиешелүү иш-чаралар жүргүзүлүүдө.