Бишкекте эки аткаминер 4000 доллар пара алып жаткан жеринен кармалды

Опузалап пара талап кылуу менен жерге-суу көзөмөл кызматынын Чүй-Бишкек региондор аралык башкармалыгынын жетекчилик курамындагы кызматкерлери кармалды. Бул тууралуу ИИМден кабарлашты.

Маалыматка ылайык, 2023-жылдын 10-август күнү ИИМдин Тергөө кызматына О.С. аттуу жаран Айыл чарба министрлигине караштуу жер жана суу көзөмөлү боюнча кызматынын жетекчилигине, ошондой эле жерге-суу көзөмөл кызматынын Чүй-Бишкек региондор аралык башкармалыгынын башчысы М.Ш. аттуу жарандар көп өлчөмдөгү айып салам деп коркутуп-үркүтүү жолу жана опузалоо менен, маселени оң жагына чечүү үчүн акча талап кылып жатканын айтып, чара көрүп берүүнү суранган.

Бул факты боюнча кылмыш иши козголгон.

2023-жылдын 11-августунда ыкчам-тергөө иш-чараларынын жүрүшүндө Раззаков-Киев көчөлөрүнүн кесилишинен 4000 доллар өлчөмүндө акча каражаты алынып жаткан жеринен, Чүй-Бишкек региондор аралык жер суу-көзөмөл кызматынын башкармалыгынын башчысы Д.Р, ошол эле министрликтин жер суукөзөмөл кызматынын Чүй-Бишкек региондор аралык башкармалыгынын бөлүм башчысы М.Ш. кармалышкан.

Учурда тергөө уланууда жана бул кылмышка тиешеси бар башка адамдар боюнча ыкчам-тергөө иш-чаралары жүргүзүлүүдө.