Ошто сүрөтчүлөрдүн сынагы өтөт

Ош шаарында сүрөтчүлөрдүн сынагы өтөт. Бул тууралуу Ош шаардык мэриясынын басма сөз кызматы билдирди.

Ага ылайык, "Урааным Манас" аталышындагы сүрөтчүлөр арасында сынак жарыяланды.

Сынак ушул жылдын 8-сентябрь күнү башталып, ага 18 жаштан жогорку курактагы каалаган сүрөтчүлөр катышса болору айтылат. Шарт боюнча сүрөт сынак күнү тартылып, ошол күнү жеринде жыйынтыкталат.

"Сынактын шарттары:

- Конкурска катышуучулардын жашы 18ден жогору болуусу керек жана категорияга бөлүнбөйт;

- Катышуучулар сынак күнү өздөрүнүн инструменттерин (боёк, калем ж.б.) алып келип сүрөт тартышат;

- Ар бир автор бирден гана сүрөт тартууга укуктуу;

- Сүрөттүн өлчөмү А2 форматта (торшон кагазы берилет), каалаган стилде жана техникада иштесе болот (живопись, графика);

- Тематикага туура келбеген сүрөттөр каралбайт;

- Конкурста тартылган сүрөттөр уюштуруучуларда калтырылат;

- Тартылган сүрөттүн арткы тарабына катышуучу аты-жөнүн калтыруу абзел", - деп жазылат маалыматта.

Ошондой эле жеңүүчүлөр баалуу белектер менен сыйланары кабарланат.