Кыргызстандык футзалчылар Беларуста өткөн КМШ оюндарында 2-орунду багындырды

Кыргызстандын футзал боюнча жаштар курама командасы Беларуста өткөн КМШ оюндарында 2-орунду ээлеп, күмүш медалга ээ болушту. Бул тууралуу бүгүн, 14-августта Маданият, маалымат, спорт жана жаштар саясаты министрлигинен билдиришти.

КМШ оюндарында футзал боюнча мелдештер 7-12-август күндөрү Минск шаарында болуп өткөн. Ага жалпы 5 курама команда катышып, айлампа форматында күч сынашышты. Келкел Анарбеков жетектеген улуттук курама команда 4 оюнда 7 упай топтоп, жалпы жыйынтыкта 2-орунду ээледи.

Кыргыз футзалчылары алгачкы оюнда Орусияга 3-0 эсебинде жеңишти тарттырып жиберишкен. Ал эми экинчи беттеште Азербайжанды 5-2 эсебинде жеңип алышты. Үчүнчү беттеш үй ээлери Беларусь өлкөсүнө каршы өтүп, 1-1 эсебинде тең чыгуу менен аяктаган. Ал эми чечүүчү оюнда Өзбекстан курамасы менен кез келип, 7-2 эсеп айырмачылыгында жеңишти камсыздашты.

Белгилей кетсек, II КМШ оюндары 4-14-август күндөрү Беларусь өлкөсүндө болуп өттү. Ага Кыргызстандан 200гө жакын спортчу катышып, 27 медаль жеңип кайтышты. Кийинки КМШ оюндары 2025-жылы Азербайжанда өтөт.