Өлкөдө жол кырсыктарын алдын алуу максатында жолдорго соккуга каршы буферлер орнотулууда

Жол кырсыктарын алдын алып, адам өлүмүн болтурбоо максатында өлкө жолдоруна соккуга каршы буферлер орнотулууда. Бул тууралуу Транспорт жана коммуникациялар министри Тилек Текебаев билдириди.

Анын айтымында, учурда иштер эки тилкеде жүрүп, Бишкек-Кара-Балта унаа жолуна 50 даана, ал эми Бишкек- Нарын-Торугарт жолуна 100 даана буфер коюлуп жатат. Кум толтурулган атайын челектин бийиктиги 80 сантиметр, диаметри 55 сантиметрди түзүп, салмагы 200 килограммга жетет.

"Жолдун ортосундагы тосмолордун баш-аягына коюлуп жаткан атайын челектер ачык түскө ээ болуп, түн ичинде да алыстан көрүнөт.

Кырсык болгон учурда буферлер соккуга жана деформацияга туруштук бере алат, бул унааларга келтирилген зыянды азайтып, жүргүнчүлөрдүн коопсуздугун камсыз кылат", - деп айтылат министрдин билдирүүсүндө.