Кыргыз-казак чек арасындагы узун кезек: Бүгүн эмне болуп жатат?

“Ак-Тилек-автожол” жана “Кең-Булуң-автожол” көзөмөл-өткөрүү жайларынын маңдайында жүк ташуучу транспорт каражаттарынын топтолуусу катталды. Бул тууралуу бүгүн, 23-августта УКМКнын Чек ара кызматынан билдиришти.

Маалымдалгандай, саат 13:00гө карата “Ак-Тилек-автожол” өткөрүү жайынын алдында Кыргызстандан чыкканга 493 унаа, “Кең-Булуң-автожол” өткөрүү жайынын алдында 146 унаа кезекте турат.

Мындан тышкары маалыматта кечээ, 22-августта Кыргызстандан Казакстанга 112 автоунаа чыкканы айтылат.

Ошондой эле кыргыз тараптан өткөрүү жайлары күнүмдүк тартипте иштеп жатат.

Эскерте салсак, 21-августта “Ак-Тилек авто жол” өткөрүү жайы алдында жүк ташуучу унаалардын топтолушу катталган. Ага байланыштуу 22-августта саат 12:00гө карата Кыргызстандан Казакстанга өтүү үчүн 430дай жүк ташуучу унаа кезекте турганын УКМКнын Чек ара кызматы кабарлаган.

Ошондой эле кечээ, 22-августта Чүй облусунда “Ак-Тилек-автожол” көзөмөл-өткөрүү жайынын алдында жардам көрсөтүү жай катары чатырлар тигилген.