ММА боюнча улуттук курама команда Азия чемпиондугунан кайтып келишти

ММА боюнча улуттук курама команда Азия чемпиондугунан кайтып келишти. Бул тууралуу бүгүн, 25-августта Дене тарбия жана спорт департаментинен кабарлашты.

Ага ылайык, 24-августта Таиланддын Бангкок шаарында өткөн ММА боюнча Азия чемпиондугунун жеңүүчүлөрү Бишкекке кайтып келди.

Спортчуларды “Ак-Жол” өткөрмө пунктунан Дене тарбия жана спорт департаментинин Спорттогу жогорку жетишкендиктер бөлүмүнүн башчысы Тилекмат Абдрахманов, Спорттун олимпиадалык эмес түрлөрү боюнча дирекциясынын директору Эркинбек Умөталиев жана мушкерлердин жакындары тосуп алышты.

"Азия чемпиондугунун алкагында А-ММА боюнча беттештер 18-20-август күндөрү өттү. Кыргызстандын курама командасы жалпысынан 4 медаль (2 алтын, 1 күмүш, 1 коло) жеңди.

65 килограммга чейинки салмак категориясында Адилет Алимбай уулу жана 70 килограммга чейинки салмакта Айжигит Эркебай уулу алтын медаль тагынды. 93 килограмм салмакта Манас Темирбек уулу күмүш медалга ээ болду.

Ошондой эле 70 килограммга чейинки салмакта Шергазы Сакыбаев коло медаль тагынды", - деп жазылат анда.

ММА боюнча улуттук курама команда машыктыруучу Байыш Ашымовдун жетекчилиги алдында мелдешке катышканы айтылат.