Эми "Электрондук күндөлүктү" Менин шаарым тиркемесинен да көрүүгө болот

"Электрондук күндөлүктү" Менин шаарым тиркемесинен көрүүгө болот. Бул тууралуу бүгүн, 4-сентябрда Бишкек мэриясынан билдиришти.

Маалымдалгандай, Бишкектеги муниципалдык бала бакчалардын жана мектептердин ишмердүүлүгү тууралуу маалыматты санарип форматта алуу үчүн Билим берүү департаментин санариптештирүү долбоорун пилоттук түрдө өткөрүүдө. Аталган долбоор кагаз иштерин азайтат.

Белгилей кетсек, пилоттук долбоор №2, 13, 42, 50, 55, 57, 58, 68, 72, 74, 77, 79, 80, 93, 97, 102 мектептерде ишке кирүүдө.

"Эми ата-энелер жана балдар акысыз Менин шаарым мобилдик тиркемеси аркылуу сабактардын графигин, үй тапшырмаларын, жетишкендиктерин жана катышуу рекорддорун көрө алышат. Мындай пилоттук долбоор "Санариптик технологиялар борбору" муниципалдык ишканасы тарабынан иштелип чыгып, борбор калаанын Ленин районунун айрым билим берүү мекемелеринде өтүүдө.

Эгерде жыйынтык ийгиликтүү болсо, долбоорду андан ары өнүктүрүү жана башка мектептерге жайылтуу жагы каралууда", - деп айтылат маалыматта.