Айдан кийин Күнгө. Индия Күндү изилдөө үчүн жаңы космостук аппаратын учурду 

Индия Күндүн сырткы катмарларына байкоо жүргүзүү жана космостук аба ырайына таасир этүүчү "күн шамалын" изилдөө үчүн космоско "Адитя-Л1" аппаратын учурду. Бул тууралуу чет элдик басылмалар жазып чыгышты.

Маалым болгондой, окуя 2-сентябрда болгон. Аппарат Жерден 1,5 миллион чакырым алыстыкта жайгашкан "Л1 Лагранж" пунктуна конот. Бул Жер менен Айдын ортосундагы аралыктан дээрлик төрт эсе көп, бирок Жерден 151 миллион чакырым алыстыкта ​​турган Күндүн өзүнө чейинки аралыктын жүздөн бир бөлүгүн гана түзөт.

Индиянын космостук изилдөө уюму (ISRO) билдиргендей, "Адитя-Л1" аппаратынын белгиленген аймакка жетишине төрт ай керек. Ошондой эле мекеменин маалыматына караганда, космостук аппараттын баасы болжол менен 46 миллион долларды түзөт.

Эске салсак, буга чейин Индиянын "Чандраян-3" автоматтык Ай станциясы Айдын бетине ийгиликтүү конгон. Муну менен Индия станциясы Айга конгон төртүнчү өлкө, ал эми Айдын түштүк уюлуна конгон дүйнөдөгү жалгыз мамлекет боло алган. Көп өтпөй "Чандраян-3" космостук аппараты Айдан алгачкы илимий маалыматтарды тараткан.