Пакистанда Кудайга акарат келтирген 5 адам өлүм жазасына тартылды

Пакистанда Кудайга акарат келтирди деп айыпталган беш адам өлүм жазасына тартылды. Бул тууралуу The Express Tribune басылмасы жазып чыкты.

Маалым болгондой, мындай кылмыш иши боюнча сот процесси "киберкылмыштуулук" менен күрөшүү бөлүмү жана Федералдык иликтөө агенттиги тарабынан башталган.

Айыпталуучулардын күнөөсү бар экенине алардын уюлдук телефондорунан табылган видеотасмалары жана социалдык тармактардагы билдирүүлөрү далил болгон.

Бул өкүм мусулмандардын август айында Пенжаб провинциясынын Фейсалабад шаарындагы христиан чиркөөлөрүнө жана христиан коомчулугунун мүчөлөрүнө жасаган кол салуулары боюнча тергөө жүрүп жаткан маалда чыгарылган. Полиция кызматы өлкөдөгү башаламандыктар стабилдүүлүктү бузууга багытталган чет элдик кутумдун натыйжасы деп билдирген.

Эске салсак, акыркы 20 жылда Пакистанда 774 мусулман жана 760 диний азчылыктын өкүлдөрү "Кудайга акарат келтирди" деп айыпталган.