ӨКМ: "Ысык-Көлдө масштабдуу команда-штабдык машыгуу башталды" 

Бүгүн, 6-сентябрда Ысык-Көлдө Өзгөчө кырдаалдар министрлигинин команда-штабдык машыгуусу башталды. Бул тууралуу аталган министрликтин маалыматында айтылат.

Кабарлангандай, машыгуу "Табигый жана техногендик мүнөздөгү өзгөчө кырдаалдар коркунучу жаралганда жана катталганда Жарандык коргонуунун мамлекеттик тутумунун аймактык, тармактык тутумчаларынын башкаруу органдарынын күч жана каражаттарынын аракеттери" аталышында өтүүдө.

Ага ылайык атайын сценарийдин негизинде облустун аймагында өзгөчө кырдаалдар жаралган учурда Жарандык коргонуу кызматтарынын абалды ыкчам жөнгө салууда башкара билүү, кырсыктын кесепеттерин жоюу, мүмкүн болуучу башка коркунучтарды алдын алуу жана күч каражаттарынын абалы бааланат.

Белгиленгендей, 6-8-сентябрь аралыгында өтө турган команда-штабдык машыгуу облустун 5 районун камтып, Жарандык коргонууну башкаруу органдарына тиешелүү тапшырмалар коюлат. Ошол эле учурда коюлган тапшырмаларга ылайык алардын иш-аракеттеринин өз убагында жана белгиленген тартипте аткарылышы бааланат.