ИИМ жасалма документтерди колдонгондор жазага тартыларын эскертти

ИИМ жасалма документтерди колдонгондор жазага тартыларын эскертти. Бул тууралуу бүгүн, 7-сентябрда Ички иштер министрлигинен билдиришти.

Маалым болгондой, акыркы убакта социалдык тармактарда күч органдарынын күбөлүктөрүн сатуу тууралуу жарнактар көбөйүүдө. Ал эми жасалма документтерди даярдоо, сатып алуу жана пайдалануу мыйзамга ылайык сөзсүз түрдө кылмыш жаза жоопкерчилигине алып келет.

"Урматтуу кыргызстандыктар жана республиканын коноктору, даярдоочунун өзү же башка адам тарабынан аны колдонуу максатында укуктарды берүүчү же милдеттерден бошотуучу расмий документти жасалмалоо, башкача айтканда расмий документке билип туруп анын чыныгы мазмунун бурмалаган жалган маалыматтарды же оңдоолорду киргизүү. Же болбосо мындай документти сатып өткөрүү, ошондой эле жасалма мөөрдү же мамлекеттик сыйлыкты даярдоо же аларды сатып өткөрүү эки жылдан беш жылга чейинки мөөнөткө эркиндигинен ажыратууга жазаланат", - деп билдиришти мекемеден.

Ага ылайык, ИИМ документтерди жасалмалоо же жасалма документтерди колдонуу Кылмыш-жаза кодексинин 379-беренесине (Документтердин жасалмасын жасоо) боюнча кылмыш жоопкерчилигине тартыла тургандыгын эскертти.

Мындан тышкары ИИМ жарандарды мыйзамдарды так сактоого, кыраакы, жоопкерчиликтүү жана юридикалык жактан сабаттуу болууга чакырышты.