Бишкекте Кыргызстан менен Венгриянын айыл чарба министрлери жолукту

Айыл чарба министри Аскарбек Жаныбеков Венгрия мамлекетинин Айыл чарба министри Надь Иштван баштаган венгриялык делегация менен жолукту. Бул тууралуу Айыл чарба министрлигинен билдиришти.

Маалым болгондой, министр Аскарбек Жаныбеков агрардык тармактын натыйжалуулугун жогорулатуу жана азык-түлүк коопсуздугун камсыз кылуу боюнча эки өлкө ортосундагы кызматташуунун маанилүүлүгүн баса белгиледи.

Ошондой эле жолугушууда үрөнчүлүк, асыл тукум мал чарбасы, суу ресурстары жана айыл чарба тармагында тажрыйба, билим алмашуу маселелери талкууланды.

Ага ылайык, Венгрия тарап жүгөрүнүн гибриддерин, расмий сыноолорду өткөрүү жаатында кызматташуунун бир нече варианттарын сунуштады. Ошондой эле Кыргызстанга жүгөрүнүн үрөнүн бере турган венгриялык компанияларга бир нече талапкер сунушталды. Мындан сырткары, сугаруунун жаңы венгриялык технологиясы көрсөтүлдү.