Каныбек Иманалиев Билим берүү министрлигинин жамааты менен коштошту (видео)

Кечээ, 7-сентябрда Каныбек Иманалиев билим берүү жана илим министри кызматынан бошотулгандан кийин социалдык тармактарда анын башкармалыктын кызматкерлерине кайрылуу жасаган видеосу жарыяланды.

Экс-министр ишеним көрсөткөн президентке, министрлер кабинетинин башчысына, парламентке жана коомчулукка ыраазычылыгын билдирген. Ошол эле учурда министрликте иштөө мүмкүнчүлүгүнө ыраазы экенин, жарым жыл анын өмүрүнүн унутулгус барагы экенин айткан.

"Мен сиздердерге үмүт, "дух" берейин деп келгем. Аны бере алдымбы аны өзүңүздөр билесиздер. Кыргызстандын билим берүү системасы өтө оор абалда. Аны 6 айда көтөрүү өтө кыйын. Биз баштаган иштерди уланткыла. Негизгиси 1 миллион 278 миң окуу куралдарын чыгарышыбыз керек", - деди Иманалиев.

Мындан сырткары ЖРТнын орточо баллын жогорулатуу, жалпы республикалык тестирлөө системасын жакшыртуу жана 2025-жылы өтө турган PISA сынагына даярдануу маселелерин эске салды.

Эскерте кетсек, кечээ, 7-сентябрда президент Садыр Жапаровдун буйругу менен Иманалиевдин ордуна Уланбек Усеков дайындалган.