Кытайда катталган тайфундан улам 300 миң адам эвакуацияланды (видео)

Кытайдын Фуцзянь провинциясында "Хайкуй" тайфунунан улам 300 миңге жакын адам эвакуацияланды. Бул тууралуу чет элдик басылмалар жазып чыкты.

Маалым болгондой, 6-сентябрга чейин облустун 65 жеринде жаан-чачындын көлөмү 250 миллиметрден ашкан. Ал эми куткаруу иштерине 60 миңден ашык жаран тартылган. Басылмалардын маалыматына караганда, куткаруу иштеринин жүрүшүндө 2 жаран каза тапкан.

Сел жана кургакчылыкка каршы штабдын маалыматы боюнча, суу ташкындары провинциядагы 1,6 миллионго жакын адамдын жашоосуна таасирин тийгизген. Учурда табигый кырсыктан улам келтирилген чыгымдын эсеби 5 миллиард юань (700 миллион доллар) экени айтылууда.