Wildberries Кыргызстандагы ишмердүүлүгүн эки жумага токтотту

Кыргызстандын аймагында Wildberries компаниясы эки жумага өз ишин токтотту. Бул тууралуу Соода-өнөр жай палатасы социалдык тармактагы баракчасында билдирди.

Маалым болгондой, Соода-өнөр жай палатасынын башчысы Темир Сариев менен Wildberries компаниясынын өкүлү Максим Губанов жолугушуп, аталган платформа аркылуу Кыргызстандан товар ташууга байланышкан олуттуу маселелерди талкуулашты. Анда компаниядан Казакстан айрым документтерди берүүсүн талап кылганы белгилүү болгон. Буга байланыштуу Wildberries Кыргызстандан товар жөнөтүүнү эки аптага токтоткон.

Палатадан билдиришкендей, күн сайын Wildberries аркылуу Кыргызстан жалпы суммасы 25 миң доллардан ашкан 5 тоннадай товар жөнөтөт.

"Мындай жагдай бул платформа аркылуу иштеген кыргызстандыктардын кирешесине олуттуу таасир этиши мүмкүн. Соода-өнөр жай палатасы көмөк көрсөтүүгө даяр. Аба каттамы жана темир жол аркылуу товарларды жөнөтүү сунуштары болгон. Бул варианттардын баары кылдат изилденет",- деп айтылат маалыматта.

Эске салсак, 22-июнда Министрлер кабинетинин төрагасы Акылбек Жапаров Wildberries ЖЧКнын негиздөөчүсү жана башкы директору Татьяна Бакальчук менен жолугушкан. Анда компания Чүй облусунун аймагына ири логистикалык борбор курууга кызыкдар экенин маалымдаган.