Ошто соода жайлардын санитардык абалы текшерилди (фото)

Ош шаарында жарандардын кайрылуусуна ылайык, калктын саламаттыгын коргоо боюнча координациялык жумушчу топ тарабынан соода жайлардын санитардык-эпидемиологиялык, ветеринардык-санитардык ченемдердин жана эрежелердин сакталышы боюнча рейд жүрдү. Бул тууралуу калаа мэриясынын маалымат кызматынан билдиришти.

Белгиленгендей, жумушчу топтун курамына Ош шаарынын мэриясынын тиешелүү бөлүмдөрүнүн, Ош шаардык санитардык-эпидемиологиялык көзөмөлдөө борборунун, ветеринардык кызматтын, Монополияга каршы кызматтын, адистештирилген мекемелердин жана ведомстволордун жетекчилери жана адистери кирди.

Рейддин алкагында Курманжан-Датка муниципалдык аймактык башкармалыгындагы жеке менчик соода түйүндөр, коомдук тамактануучу жайлар, тиш дарылоочу борборлор, сулуулук жана, косметологиялык салондор текшерүүгө алынды.

Мындан тышкары, Түштүк-Чыгыш (Юго-Восток) кичи районунда уруксат кагазы жок иштеп жаткан кондитердик цех аныкталып, тиешелүү органдарга өткөрүлүп берилди.

Рейддик иш-чаралар сентябрдын аягына чейин уланат.