"Эрдик кылсаңыз сүрө кылыңыз". Шайлообек Атазов Камчыбек Ташиевге кайрылды

Депутат Шайлообек Атазов Профсоюздар федерациясы боюнча маселени бүгүн, 13-сентябрда Жогорку Кеңеште көтөрдү.

Ал Профсоюздар федерациясынын ишине тиешелүү органдар реакция кылбай жатканын, бардыгына өлкө башчы өзү киришкенде гана иштер жылып жатканын айтты.

"Кечээ көчмө жыйында президентибиз тапшырманы бергенде гана кыймылдап баштады. Башкача айтканда, президент салык боюнча маселе болсо "Дордойго" барат, Циркте көйгөй болсо ал жакка барат, Профсоюздар боюнча тапшырма берет. Башка органдар кыймылдабай жатат десек болобу?", - деди Атазов.

Ал ошондой эле трибунадан бул боюнча УКМК башчысы Камчыбек Ташиевге кайрылды.

"Урматтуу Камчыбек Кыдыршаевич, эрдик кылсаңыз сүрө кылыңыз. Ушул профсоюздардын кылмыштуу ишин аягына чыгарып бериңиз. Көзөмөлгө алып коюңузчу. Булар мени, Чолпон Аалыевнаны жана башка эки-үч депутатты, эксперттерди сотко беришиптир. Эми биз алар менен мыйзам чегинде күрөшөбүз, коркпойбуз", - деп кошумчалады Атазов.