Бишкектеги имараттардын фасаддары жаңыланууда

Бишкектеги имараттардын фасаддары жаңыланууда. Бул туурасында калаа мэриясынын маалымат кызматынан билдиришти.

Кабарлангандай, Биринчи май районунда Ч.Айтматов проспектисинин боюндагы чарбалык субъекттердин кире бериши, маалымат түзүмдөрү жана жарнак такталары демонтаждалгандан кийин «Бишкек башкыархитектура» муниципалдык ишканасынын эскиздик долбооруна ылайык чарба жүргүзүүчү субъекттер өздөрүнүн фасаддарын иретке келтире башташты.

Алсак, №16, 18, 24а, 32, 40, 50, 54, 58, 64а даректеги имараттарында фасад иштери жүрүп жатат.

Свердлов районунда Абдрахманов көчөсүндөгү №135, 129 үйлөрдүн фасадын сырдоо иштери жүрүп жатат, ал эми №119 үйдүн фасадын жаңылоо пландалууда.

Белгилей кетсек, буга чейин акимчиликтин кызматкерлери «Бишкекбашкыархитектура» МИ, Бишкек шаарынын мэриясынын Жерди пайдаланууну контролдоо боюнча башкармалыгы МАБ менен биргеликте чарбалык субъектилерге түшүндүрүү иштерин жүргүзүп, ошондой эле эскиздик долбоорлорун таратышкан.