Автотранспорт каражаттарын онлайн түрдө кайра каттоо боюнча пилоттук долбоор ишке кирди

Ички иштер министрлиги Санариптик өнүктүрүү министрлиги менен биргеликте автотранспорт каражаттарын онлайн түрдө кайра каттоо боюнча пилоттук долбоорду ишке киргизишти. Бул тууралуу бүгүн, 14-сентябрда ИИМден билдиришти.

Маалым болгондой, пилоттук долбоор президенттин администрациясынын демилгеси менен иштелип чыккан жана "РСК Банк" ААК платформасында ишке ашырылды.

"Онлайн кайра каттоо үчүн ИИМдин “Унаа” мекемесинин бөлүмдөрүндө унаа фото-видео кароодон өтүш керек, визуалдык текшерүүнүн маалыматтары базада 30 күн сакталат.

Онлайн кайра каттоо “RSK 24” тиркемесинин колдонуучулары үчүн жеткиликтүү болот.
Эгерде айып пулу жок жана транспорт каражаты камакка алыбаган учурда, сиз унааны онлайн сатууга мүмкүнчүлүгүңүз болот", - деп айтылат маалыматта.

Мындан тышкары мекемеден жакынкы келечекте онлайн кайра каттоо башка төлөм тутумдарында да жеткиликтүү болорун кошумчалашты.