Жалал-Абадда Баткенде курман болгон жоокерлер эскерилди

Бүгүн, 14-сентябрда Жалал-Абад облусунда былтыр Тажикстандын куралдуу кол салуусунда курман болгон жоокерлер эскерилди. Бул тууралуу президенттин өкүлчүлүгүнөн билдиришти.

Маалыматка ылайык, ага маркумдардын жакындары, президенттин Жалал-Абад облусундагы ыйгарым укуктуу өкүлү Абсаттар Сыргабаев, УКМКнын Чек ара кызматынын Жалал-Абад облусу боюнча башкармалыгынын башчысы Сапарбек Токтосунов, облус мусулмандарынын казысы Нематулла ажы Жээнбеков жана жергиликтүү бийлик өкүлдөрү катышты.

"Иш-чарада облус башчысы жоокерлердин жакындарына көнүл айтып, мындан ары өлкөдө ар дайым тынчтык болуусун тилеп, эл-жердин бүтүндүгү үчүн өз жанын аябаган эр азаматтардын элеси түбөлүккө сакталаарын белгиледи. Ошондой эле ал маркум жоокерлердин жакындарына облустук, райондук жана жергиликтүү бийлик тарабынан көрсөтүлгөн акчалай колдоолорду тапшырды", - деп айтылат маалыматта.

Эске салсак, 2022-жылдын сентябрь айындагы кыргыз-тажик чек арасындагы кандуу кагылышта Кыргызстандын 63 жараны курман болгон, 206 киши ар кандай жараат алган.

Жалал-Абад облусунан жалпы 10 жоокер курман болгон. Алардын жакындарына мамлекет тарабынан Бишкек шаарынан бир бөлмөлүү батир жана акчалай жардамдар көрсөтүлгөн.