Ниязбеков Казакстанда КМШ өлкөлөрүнүн ИИМ башчыларынын жыйынына катышты 

Бүгүн, 15-сентябрда ички иштер министри Улан Ниязбеков Казакстандын Түркестан шаарында КМШга мүчө мамлекеттердин ички иштер министрлеринин кеңешинин кезектеги жыйынына катышты.

ИИМдин басма сөз кызматынан билдиргендей, жыйынга Азербайжан, Армения, Беларусь, Казакстан, Орусия, Тажикстан, Түркмөнстан жана Өзбекстандын ички иштер министрликтеринин делегациялары, КМШнын Аткаруу комитетинин, шериктештикке мүчө мамлекеттердин Терроризмге каршы борборунун жана Уюшкан кылмыштуулукка, кылмыштардын башка коркунучтуу түрлөрүнө каршы күрөшүүнү координациялоо боюнча бюросунун өкүлдөрү катышты.

"Катышуучулар мамлекеттер аралык издөөнү ишке ашыруу, киберкылмыштуулукка жана баңгизаттарды мыйзамсыз жүгүртүүгө каршы күрөшүү, транспорттогу кылмыштуулукка каршы аракеттенүү маселелерин, ошондой эле 2019-2023-жылдарга кылмыштуулук менен күрөшүү боюнча биргелешкен чаралардын мамлекеттер аралык программасын ишке ашыруунун жүрүшүн кеңири талкуулашып, биргелешкен ыкчам-алдын алуу иш-чараларынын жана атайын операциялардын жыйынтыктары чыгарылды", - деп айтылат билдирүүдө.