Кыргызстанда кийинки жылдан тарта чет элдик тасмалар кыргыз субтитрлери менен көрсөтүлөт

Кыргызстанда 2024-жылдын жазынан тарта чет элдик тасмаларды кыргыз субтитрлери менен көрсөтүлө баштайт. Бул тууралуу Кинематография департаментинен билдиришти.

Маалым болгондой, чет элдик тасмалардын ири дистрибьюторлору “Кыргызтасмасы” мамлекеттик киноборбору менен 2024-жылдын жазынан тарта Кыргызстандын кинотеатрларында көрсөтүлө турган бардык чет элдик тасмалар кыргызча субтитрлер менен көрсөтүлө тургандыгы жөнүндө макулдашышты.

“Кыргызтасмасы” мамлекеттик кино борборунун директору Талантбек Төлөбеков чет элдик тасмаларды кыргыз тилине дубляждоо маселеси боюнча алгачкы кадам ташталганын билдирди. Анын айтымында, баштапкы этапта эң оптималдуу вариант бул – субтитр менен коштоо, себеби дубляж жана синхрондуу котормо чоң бюджетти талап кылат.

Эске салсак, быйыл 17-июлда президент Садыр Жапаров "Кыргыз Республикасынын мамлекеттик тили жөнүндө” конституциялык мыйзамга кол койгон. Анда мамлекеттик тилди колдонуунун жана мамлекеттик тил саясатын жүзөгө ашыруунун укуктук негиздери белгиленген.