Өкмөт Бишкекте унду өз баасында саткан жарманкелерди уюштурууда. Дареги, баасы

Өлкөдө ун рыногундагы абалды турукташтыруу максатында Айыл чарба министрлиги ун азыктарын өз баасында сатуу боюнча жарманкелерди уюштурду. Бул тууралуу мекеменин басма сөз кызматынан билдирди.

Бишкек шаарындагы ун сатыла турган жарманкелердин дареги:

"Ош" базары;

"Аламүдүн" базары ("Табылга" соода борборунун аялдамасы);

"Орто-Сай" базары ("Оберон" бөлүмүнүн кире бериши);

"Дордой фут" базары.

Бишкек шаарындагы жарманкедеги жергиликтүү өндүрүштөн чыккан ундун бир кабынын наркы:

жогорку сорт - 1 860 сом;

1-сорт - 1 500 сом;

2-сорт - 1 125 сом.

Ошондой эле министрлик Мамлекеттик материалдык резерв фондунан 40 миң тонна буудай кампадан чыгарыларын билдирди.

Эскерте кетсек, кечээ Жогорку Кеңештин жыйынында депутат Тазабек Икрамов ундун кымбатташы тууралуу маселе көтөрүп, өлкөдө бир кап ун бир заматта миң сомго кымбаттаганын сындаган.

Ал эми Марлен Маматалиев ундун кымбаттаганына өкмөт жетиштүү деңгээлде чара көрбөй жатканын айтып, нааразы болгон.

Андан соң УКМКнын төрагасы Камчыбек Ташиев депутаттарга жооп берип, аларды "хайп" кармап жатат деп айыптаган.

Өлкөдө ушул аптанын башынан бери ун кымбаттап, анын натыйжасында нандын баасы да көтөрүлүп кетти. Соодагерлер Казакстандан ташылып келинген ундун кабы миң сомго кымбаттаганын айтышууда. Ал эми өкмөт өлкөдө буудай тартыштыгы жок экенин, казак уну темир жолдогу сезондук тыгындан улам кымбаттап жатканын билдирди. SUPER.KG порталы учурда абал кандай экенин соодагерлер менен тургундардын өз оозунан угуп келген. Материалдын шилетемеси бул жерде.