Бишкектин Киргизия-1 конушундагы бала бакча бөбөктөргө эшигин ачты (сүрөт)

Бишкектин Киргизия-1 конушундагы бала бакча бөбөктөргө эшигин ачты. Бул тууралуу бүгүн, 25-сентябрда Бишкек мэриясынан билдиришти.

Маалым болгондой, Бишкек шаарынын мэри Эмилбек Абдыкадыровдун катышуусунда №26 бала бакча ачылды.

Ага ылайык, Капиталдык курулуш башкармалыгы Самойленко көчөсү, 5а дарегинде жайгашкан бала бакчага кошумча корпустун курулуш иштерин аяктады.

"Мектепке чейинки билим берүү мекемеси 140 орунга ылайыкталган. Эки кабаттуу, жер төлөсү жок. Имараттын жалпы аянты – 1442 чарчы метр. Бала бакчанын сметалык наркы – шаардык бюджеттен 118 миллион сомду түзөт.

Бала бакча медициналык бөлмө, ашкана, кир жуучу жай жана чарбалык бөлмөлөр менен камсыздалган. Ойноочу жана уктоочу бөлмөлөрдөн тышкары музыка сабагы үчүн өзүнчө бөлмө каралган", - деп айтылат маалыматта.

Ошондой эле бала бакчанын аймагы жашылдандырылып, ар бир топ үчүн өзүнчө балдар аянтчалары орнотулду.

Белгилей кетсек, курулуш иштери "Гипер Строй" ЖЧКсы тарабынан жүргүзүлдү.