Айбек Жунушалиев ИИМде күбө катары маалымат берип чыкты

Президенттин жана министрлер кабинетинин чечимдерин даярдоо боюнча башкармалыгынын башчысы Айбек Жунушалиев Ички иштер министрлигине күбө катары маалымат берди. Бул тууралуу бүгүн, 26-сентябрда президенттин Администрациясынын маалыматтык саясат кызматынын башчысы Дайырбек Орунбеков билдирди.

Кечээ, 25-сентябрда жергиликтүү басылмаларда Жунушалиевдин суракка чакырганы боюнча маалыматтар тараган. Анда чет элдик инвесторлордон акча каражатын талап кылып камалгандардын ишине байланыштуу сурак бергени айтылган. Орунбековдун айтымына караганда, Жунушалиев суракка алынган эмес, ал күбө катары маалымат берген.

Эске салсак, кечээ президенттин басма сөз катчысы Эрбол Султанбаев Facebook баракчасында ишкер адам жогорку кызматтагы адамдар менен байланышы бар экенин айтып, инвесторлордон акча талап кылганын маалымдаган.