Сокулукта ок атуу менен коштолгон жаңжал: Издөөдө жүргөндөр кармалды

Сокулук районундагы Жаңы-Жер айылында болгон жапырт мушташка катышууга шектелгендер кармалды. Бул тууралуу бүгүн, 26-сентябрда Чүй облустук милициясынан билдирди.

Маалым болгондой, ыкчам-иликтөө иш-чараларынын жүрүшүндө 100дөн ашык адам суракка алынып, 27 жолу тинтүү жүргүзүлгөн. Анын натыйжасында мыйзамсыз жүгүртүүдөгү ири өлчөмдө курал-жарак жана ок-дарылар сакталган жай табылган.

Буга чейин окуяга тиешеси бар деген шек менен Курбангаджи Абдуллаев менен Магомед-Эмин Даудовдун издөөдө жүргөнү айтылган. Бүгүн, 26-сентябрда издөөдө жүргөндөр кармалып, райондук ички иштер бөлүмүнүн убактылуу кармоочу жайына киргизилди.

Алардан иш боюнча далил катары 7,62 миллиметр калибрдеги он огу менен "Сайга-МК" мылтыгы (Восток айылынын жанындагы талаага катылган) жана 51 огу бар АК-74 автоматы (Васильевка айылына жакын жердеги талаада көмүлгөн) табылган. Мекемеден билдиришкендей, учурда кылмыш иши боюнча тергөө уланууда.

23-сентябрда 1954-жылы туулган Д.М., 1988-жылы туулган М.М. жана 1997-жылы туулган М.М. аттуу жарандардын кармалганы айтылган. Ал эми Чүй облустук милициясынан 1990-жылы туулган Д.Г., 1998-жылы туулган М.М. жана 1958-жылы туулган А.Х. аттуу жарандардын да кармалып, убактылуу кармоочу жайга киргизилгенин билдиришкен.

Эске салсак, 22-сентябрда Жаңы-Жер айылында болгон калайман мушташ маалында атылган октон 69 жаштагы бир киши каза тапкан. Ок тийген дагы 37 жаштагы адам ооруканага түшкөн.