"Кооперативдер динди жамынып тозокко алып баратат". Маматалиев диний аталыштагы кооперативдердин ишине тыюу салууну сунуштады

Бүгүн, 27-сентябрда Жогорку Кеңештин жыйынында “Кооперативдер жөнүндөгү” мыйзамга киргизилип жаткан өзгөртүүлөр экинчи окууда каралып, жактырылды.

Мыйзам долбоору Министрлер кабинети тарабынан демилгеленген.

Жыйында баяндама жасаган юстиция министринин орун басары Орозбек Сыдыков белгилегендей, “Кооперативдер жөнүндөгү” мыйзам 2004-жылы кабыл алынып, мыйзам иштеп жаткан 18 жыл аралыгында 6 жолу өзгөртүү киргизилген. Бүгүнкү күндө турак жай-курулуш кооперативдерине кошулуу аркылуу кыймылсыз мүлккө ээ болуу ыкмасы активдүү жайылууда.

“Турак-жай курулуш кооперативдерине акчаларын салып, бирок жарандар акчасынан да ажырап, мүлксүз да калышкан учурлар арбын. Андыктан кырдаалды эске алуу менен бул мыйзам долбоору иштелип чыкты” - деди министрдин орун басары.

Талкуу маалында депутат Марлен Маматалиев диний аталыштагы кооперативдердин ишине тыюу салууну сунуштады.

Эл өкүлү Юстиция министрлиги аталышы диний сөздөрдү камтыган мекемелерди уюм катары каттабай коюшу керектигин айтып, антпесе элдин ишенимин пайдаланып алдап кеткендер четтен чыгып жатканын белгиледи.

"Бир кооператив ислам динин жамынып алгандыктан, айылдарда керек болсо молдолор кирип кетиптир. Анан молдону көрүп жөнөкөй жарандар да акча салган. Анын аталышы "Ислам" болчу, ошого карап реалдуу экен деп ишенип алышкан. Азыр бул кооператив элге 256 миллион доллар карыз экен. Дагы бир чоң "бомба" келе жатат. Кооперативдерге кайрыларым, динди жамынып алдабагылачы, силер элди тозокко алып баратасыңар", - деди Маматалиев.