"Балыкчы-Кочкор" темир жолунун курулушу кызуу жүрүүдө

"Балыкчы-Кочкор" темир жолунун курулуш иштери кызуу жүрүп жатат. Бул тууралуу бүгүн, 29-сентябрда "Кыргыз темир жолу" ишканасы маалымдады.

Маалыматка караганда, 2022-жылы пландалган 5 чакырым темир жол толугу менен курулуп бүткөн. Жумуштар толугу менен "Кыргыз темир жолу" ишканасынын өздүк каражатынын эсебинен аткарылган.

Ага ылайык, ушул жылга 15 чакырым курулушу пландалып, анын ичинен 11 километр төмөнкү курулуш жол даярдалып бүттү. Калган 4 чакырымында иштер уланууда жана белгиленген мөөнөттө бүткөрүлөт. Мындан тышкары даярдалган жолдо темир-бетон шпалдарын, рельстерди төшөө иштери жүргүзүлүүдө.

Курулуш иштерине жалпысынан ишканадан 85 жумушчу жана 26 атайын техника тартылган.

Белгилей кетсек, 2022-жылдын 31-мартында президент Садыр Жапаров "Балыкчы-Кочкор-Кара-Кече" темир жолунун курулушунун башталышына старт берген. "Балыкчы-Кочкор-Кара-Кече" (186 чакырым) долбоорун ишке ашыруунун биринчи этабы - узундугу 63 чакырым болгон "Балыкчы-Кочкор" темир жолунун участогун куруу саналат.