Бишкекте КМШ өлкөлөрүнүн өнөр жай саясаты боюнча кеңешинин жыйыны өтүп жатат

Бүгүн, 29-сентябрда Бишкек шаарында КМШга мүчө-мамлекеттердин өнөр жай саясаты боюнча кеңешинин тогузунчу отуруму өтүүдө. Бул тууралуу Экономика жана коммерция министрлигинен билдиришти.

Маалыматка ылайык, жыйынга кеңештин мүчөлөрү жана Беларусь, Казакстан, Орусия, Тажикстан, Өзбекстан, КМШнын Аткаруу комитетинин, илимий жана билим берүү уюмдарынын жана шериктештикке кирген мамлекеттердин бизнес-коомчулугунун өкүлдөрү катышууда.

Кеңештин жыйындары КМШга мүчө-мамлекеттердин министрликтеринин, ведомстволорунун жана адистештирилген уюмдарынын жетекчилеринин жана эксперттеринин өнөр жай саясаты чөйрөсүндөгү маселелерди жана милдеттерди коллегиалдуу талкуулоо, экономиканын түрдүү тармактарын өнүктүрүү боюнча макулдашылган маанилүү чечимдерди кабыл алуу үчүн маанилүү аянтча болуп саналат.

Жыйында экономика жана коммерция министри Данияр Амангелдиев сөз сүйлөп, Кыргызстан КМШга төрагалык кылган өлкө катары быйыл ар кыл тармактарда өз ара аракеттенүүнү бекемдөөгө багытталган түрдүү иш-чараларды уюштуруп өткөрүп жатканын белгиледи.

Быйыл КМШ органдарына Кыргызстан төрагалык кылууда.