Ошто опузалап акча талап кылган милиция кызматкери кармалды (видео)

Ошто милиция кызматкерлери тургундан 400 миң сом акча каражатын опузалап талап кылууга шектелип жатат. Бул тууралуу бүгүн, 29-сентябрда УКМКдан билдиришти.

Маалыматка караганда, Ош ШИИБдин төрт ыкчам кызматкери милициянын капитаны Т.Б.Н., милициянын майору И.И.И., капитан Э.С.Э. жана майор Ж.у.Н. зордуктоо фактысы боюнча кылмыш ишин козгойбуз деп коркутуп, Ош облусунун тургунунан 400 миң сом өлчөмүндө акча талап кылышкан.

Ага ылайык, ушул жылдын 25-сентябрында 100 миң сом алып жаткан жеринен ортомчу кармалып, андан соң Ош ШИИБдин опер кызматкери, милициянын майору Ж.у.Н. кармалды. Көрүлгөн чаралардын жүрүшүндө жогоруда аталган милиция кызматкерлеринин кылмышка катышуусунун бар экендиги аныкталды.

Учурда кармалган Ж.у.Н.га карата эки айлык мөөнөткө УКМКнын тергөө абагына камакка алуу түрүндөгү баш коргоо чарасы тандалган.

"Ал эми бул кылмышка тиешеси бар жогоруда аталган дагы үч кызматкер учурда тергөөдөн жашырынып жүргөндүктөн 28-сентябрда соттун чечими менен аларга карата сыртынан камакка алуу түрүндөгү баш коргоо чарасы тандалып, алар издөөгө алынды", - деп айтылат маалыматта.