Орусия Касым-Жомарт Токаевдин санкция тууралуу айткандарына реакция жасады

Орусия Казакстан менен тышкы терс таасирсиз мындан аркы натыйжалуу кызматташууну чыдамсыздык менен күтөт. Бул тууралуу Орусиянын Тышкы иштер министрлиги казак президенти Касым-Жомарт Токаевдин Астананын Орусияга каршы батыш өлкөлөрүнүн санкциялык режимин сактоо ниети тууралуу айткандарына комментарий берип жатып билдирген.

"Биз казак өнөктөштөрүбүз менен жакшы коңшулук мамилелерибизге, анын ичинде соода-экономикалык кызматташтыкка терс таасирин тийгизбөө үчүн мындан ары да эффективдүү иштешебиз деп күтөбүз. Бул абдан масштабдуу жана эки өлкөгө тең чоң пайда алып келет", - деп билдирди Орусиянын Тышкы иштер министрлиги.

Ошондой эле министрлик Москва Казакстандын үчүнчү өлкөлөр менен мамилесине кийлигишпей турганын баса белгиледи.

Кечээ, 28-сентябрда Токаев Германиянын канцлери Олаф Шольц менен сүйлөшүүлөрдүн жыйынтыгы боюнча маалымат жыйынында Казакстан Орусияга киргизилген санкциялык режимди сактай турганын жана Берлин бул жагынан кооптонбошу керектигин айткан.