Быйыл өлкөдө миңден ашык соттолуучунун  334үнө ырайым берилди

Бүгүн, 3-октярбда Конституциялык мыйзамдар, мамлекеттик түзүлүш, сот укук маселелери жана Жогорку Кеңештин регламенти комитетинин жыйынында Кылмыш-жаза кодексине өзгөртүү киргизүүнү жана "Ырайым кылуунун жалпы принциптери жөнүндөгү мыйзамды өзгөртүү" долбоору экинчи окууда жактырылды.

Жыйында президенттин администрациясынын Ырайым кылуу комиссиянын катчысы Светлана Бондаренко ушул жылы өлкө башчысынан ырайым сурап миңден ашык соттолуучу кайрылганын айтты.

"Быйыл биздин комиссия ырайым сураган 1038 кайрылууну карап чыкты. Алардын ичинен 334 адамга гана ырайым берилди. Бирок ырайым берилди деген эркиндикке чыкты дегенди билдирбейт. Көпчүлүгүнүн жаза аткаруу мөөнөтү кыскартылды. Ал эми быйыл өмүр бою эркинен ажыратылгандарга ырайым берилген жок", - деди Бондаренко.

Ал эми юстиция министринин орун басары Орозбек Сыдыков мыйзамдагы айрым өзгөртүүлөр өмүр бою эркинен ажыратылган жарандарга тиешелүү экенин маалымдады.

Азыркы мыйзамга ылайык, өмүр бою эркинен ажыратылган адам түрмөдө 20 жыл отургандан кийин өлкө башчыдан ырайым сурай алат. Эгер ырайым кабыл алынбаса, анда экинчи жолу 10 жылдан кийин гана кайрылса болот. Долбоордо 10 жылды беш жылга кыскартуу сунушталууда.