Министр Бишкекте жана Ошто Кара-Кеченин көмүрү канчадан сатыларын айтты

Бүгүн, 4-октябрда Жогорку Кеңештин жыйынында энергетика министри Таалайбек Ибраев Бишкекте Кара-Кече көмүрү жок деген маалыматты төгүндөдү. Министрдин айтымында, көмүрдүн баасы 4500-5000 сомго чейин болот.

"8-сентябрдан бери көмүр сыртка чыккан жок. Азыр 6500 сомго чейин көтөрүп жатышат. Бирок "Кыргыз көмүр" ишканасы менен Чүйдө 4500-5000 сомдон сатылат деп пландап жатабыз. Ал эми Ош жана Баткенде 6 миң сомго чейин барат", - деди Ибраев.

Ибраев жаңы ишке кире турган Урмизан кенинин көмүрүн Ош жана Баткен облустарынын тургундарына тоннасын 5 миң сомдон болот деп сүйлөшүлгөнүн айтты.

"10-октябрдан баштап Урмизан кени казыла баштайт. Ошону иштетем деген ишкерлер менен Ош жана Баткенде тоннасын 5 миң сомдон ашырбайсыңар деп келишим түздүк. Бул аймактарда көмүрдүн тоннасын 5-6 миңдин тегерегинде кармайбыз деген планыбыз бар", - деди ал.