"Таанылгыс болуп өзгөргөн". Бишкекте имараттардын сыртын иретке келтирүү иштери уланууда

Бишкектин Биринчи Май районундагы эки имараттын сырткы түзүлүшү таанылгыс болуп оңдолду. Бул тууралуу бүгүн, 4-октябрда Бишкек мэриясынан билдиришти.

Маалыматка караганда, Бишкектин Жибек-Жолу проспектиси, 326 дарегиндеги "Кыргызстандын улуттук электр тармагы" ААКсынын имаратынын сырткы сырдоо иштери жүргүзүлдү.

Мындан тышкары Кыргыз эл аралык университетинин (ЭУ) чет элдик студенттери жашаган Фучик көчөсү, 47Б дарегинде жайгашкан "Гурукул" жатаканасынын фасады жогорку технология менен жасалып, аны менен катар жанаша жайгашкан аймактарда көрктөндүрүү жана тазалоо иштери жүргүзүлдү.

Белгилей кетсек, мындай демилгелер Биринчи Май районунун муниципалдык администрациясынын жарандык сектор менен өз ара аракеттенүүсүнүн жана бизнес-коомчулуктун өнөктөштүгүнүн аркасында жүргүзүлүүдө.