Эдил Байсалов БУУнун Өнүктүрүү программасынын өкүлү Александра Соловьева менен жолугушту

Министрлер кабинетинин төрагасынын орун басары Эдил Байсалов Бириккен улуттар уюмунун Өнүктүрүү программасынын жаңы дайындалган туруктуу өкүлү Александра Соловьева менен жолугушту. Бул тууралуу бүгүн, 5-октябрда Министрлер кабинетинен билдиришти.

Маалыматка караганда, Эдил Байсалов Александра Соловьеваны жаңы кызматка дайындалышы менен куттуктап, Кыргызстандагы миссиясына ийгиликтерди каалады.

Ага ылайык, ал Кыргызстандагы БУУнун системасындагы уюмдарынын ичинен эң маанилүү эл аралык өнөктөш болуп саналарын жана учурда жалпы суммасы 59 миллион 786 миң долларга жакын 22 долбоорду ишке ашырып жаткан БУУнун Өнүктүрүү программасынын Бишкектеги кеңсеси менен кызматташуунун жогорку деңгээлин белгиледи.

"Эки тараптуу сүйлөшүүдө Кыргызстанды социалдык-экономикалык жактан өнүктүрүү, БУУнун Туруктуу өнүктүрүү максаттарына жетишүү, билим берүү, климаттын өзгөрүшү жана тоолуу аймактарды колдоо, жаратылышты коргоо, өзгөчө кырдаалдар, гендердик теңчилик, саламаттыкты сактоо жаатындагы кызматташуу маселелери талкууланды", - деп айтылат маалыматта.

Ал эми Александра Соловьева БУУнун Өнүктүрүү программасы өлкөнүн улуттук артыкчылыктарынын жана программаларынын негизинде Кыргызстанды өнүктүрүүгө жардам көрсөтүүнү улантууга даяр экенин билдирди.