Кызыл-Кыядагы мектептеги акча чогултуу боюнча билим берүү башкармалыгы жооп берди

Буга чейин тургун Баткен облусуна караштуу Кызыл-Кыя шаарынын №4 Александр Пушкин атындагы мектепте акча чогултуу токтобой жаткандагы тууралуу ЭЛДИК КАБАР бөлүмүнө кабарлаган.

Билдирүүгө жооп берип жатып Кызыл-Кыя шаарынын Билим берүү башкармалыгынын жетекчиси Дамира Матосмонова акча чогултуу боюнча мугалимдин, мектептин директорунун да кабары жок экендигин айтты.

"Сиздер маалыматты жарыялаганда эле мен ошол мектепке барып, териштиргем. Ал жерде ата-энелер өздөрү эле акча чогултушкан экен. Мугалимдин да, мектеп директорунун да партага, пол жууганга акча чогултканы жөнүндө кабары жок болуп чыкты. Ошол акчаны чогулткан ата-энелерди чакырып, чоң териштирүү болду. Алар өз каалоолору менен чогултушканын айтышты. Мугалим, мектеп директору, акча чогулткан ата-энелер баары түшүнүк кат жазышты. Ошол замат чогулткан акчалары кайтарылып берилди. Негизи мен деле, мектеп директорлору деле акча чогултуулар болбосун деп эскертип эле келе жатабыз. Баарыбыз мыйзамга баш ийишибиз керек", - деди Матосмонова.