Караколдо Москва мамлекеттик университетинин филиалы ачылат

Караколдо Ломоносов атындагы Москва мамлекеттик университетинин филиалы ачылат. Бул тууралуу бүгүн, 6-октябрда президенттин маалымат кызматынан билдиришти.

Маалым болгондой, тиешелүү буйрукка президент Садыр Жапаров кол койгон.

Билдирүүдө токтом жогорку билими бар квалификациялуу кадрларды даярдоону андан ары өнүктүрүү, өркүндөтүү жана Кыргызстан менен Орусиянын ортосунда жогорку билим берүү жаатындагы кызматташтыкты кеңейтүү максатында кабыл алынганы жазылган.

Ошондой эле университеттин филиалынын иши эки өлкөнүн мыйзамдарына ылайык жүргүзүлөрү, ал эми окуу жайга абитуриенттерди кабыл алуу жана бүтүрүүчүлөрдү мамлекеттик жыйынтыктоочу аттестациялоосу Москва мамлекеттик университети тарабынан белгиленген тартипте жүргүзүлө турганы айтылган.

Мындан сырткары аталган окуу жайдын филиалына мамлекеттик билим берүү грантынын эсебинен жыл сайын 60 орун бөлүү каралып, 2024–2025-окуу жылынан баштап Москва мамлекеттик университетинин филиалы өлкөнүн республикалык бюджетинин эсебинен каржылана турганы маалымдалган.