"Уюшкан кылмыштуу топ коркутса кабарлагыла". УКМК ишкерлерге кайрылды

Улуттук коопсуздук мамлекеттик комитети жарандарды уюшкан топтордун зомбулуктарын кабарлап турууга чакырат. Бул тууралуу аталган мекемеден билдиришти.

Маалыматка ылайык, УКМК жарандардын, мамлекеттин коопсуздугун камсыз кылуу, инвесторлордун, бизнес-коомчулуктун укуктарын коргоо, инвестициялык климатты чыңдоо максатында уюшкан кылмыштуу топтор менен күрөшүүгө жигердүү киришкенин кабарлады.

"Буга байланыштуу УКМК уюшкан кылмыштуу топтун жетекчилеринин жана активдүү мүчөлөрүнүн мыйзамсыз аракеттеринен жапа чеккен бардык жарандарды, бизнес чөйрөсүнүн өкүлдөрүн мындай фактылар боюнча УКМКга билдирип турууга чакырат", - деп айтылат маалыматта.

Эске салсак, Бишкекте 4-октябрда кримтөбөл Камчы Көлбаев жок кылынган. УКМКнын төрагасы Камчыбек Ташиев кримдүйнөнүн өкүлдөрүнө кайрылып, мыйзамга баш ийбегендерге катуу чара көрүлөрүн эскерткен.