Бир жума ичинде кыргыз-тажик чек арасынын 43,32 чакырым тилкеси макулдашылды

Бишкек менен Дүйшөмбү кыргыз-тажик мамлекеттик чек арасынын 43,32 чакырымы боюнча макулдашты. Бул тууралуу бүгүн, 8-октябрда Министрлер кабинетинен билдиришти.

Маалыматка ылайык, делегациялардын жолугушуусу 3-8-октябрда Баткенде өттү. Тараптар Тажикстандагы кийинки жолугушууда калган аймактарды тактоону улантышат.

Жолугушуунун жыйынтыгында тиешелүү протоколго кол коюлду. Жолугушуу достук маанайда жана өз ара түшүнүшүү кырдаалында өттү.