Нарында тоют аздыгын жоюу үчүн Орусиядан арпа ташылууда

Нарын аймагында кургакчылыктан улам тоют аз жыйналганына байланыштуу Орусиядан арпа алып келинүүдө. Бул тууралуу президенттин аталган облустагы өкүлчүлүгүнөн билдиришти.

Маалыматка ылайык, Нарын дубаны боюнча быйыл тоют чөптүн түшүмдүүлүгү орточо алганда 30 центнерди түзүп, 228 миң 796,4 тонна жыйналган. Ал былтыркыга салыштырмалуу 52 миң 683 тоннага аз.

Ошондой болсо да облус жетекчилиги тарабынан альтернативдүү тоют менен камсыздоо аракеттери көрүлүп, Орусиядан алып келинген арпа килограммы 21 сомдон сатыкка коюлду. Ат-Башы районуна 450 тонна, Ак-Талаа районуна 180 тонна, Нарын районуна 95 тонна сатылды. Учурда башка райондорго алып келүү боюнча иштер жүрүп жатат.

"Ал эми жергиликтүү кооперативдер тарабынан Нарын районунун Учкун айылында чыктуу тоют даярдалып, фермерлерге жеткиликтүү баада - килограммы 8-10 сомдон сатылууда. Бүгүнкүгө чейин дыйкан-фермерлер 350 тонна чыктуу тоют менен камсыз болду. Ал эми сырттан келген чыктуу тоют 8-13 сомду түзөт", - деп айтылат маалыматта.