Евробиримдик Кыргызстандын билим берүү тармагына 7 миллион евро бөлдү

Европа Биримдиги Кыргызстандын билим берүү тармагы үчүн 7 миллион евро которду. Бул тууралуу Билим берүү жана илим министрлигинен билдиришти.

Маалым болгондой, Евробиримдик өкмөткө гранттык негизде 7 миллион евро же болжол менен 665 миллион сом бөлгөн. Министрликтин билдирүүсүнө караганда, бул аталган уюм тарабынан 2023-2026-жылдарга билим берүүнү өнүктүрүү стратегиясын ишке ашыруу үчүн бөлүнгөн 27 миллион евро суммасындагы гранттын биринчи траншы болуп саналат.

"Грант билим берүүнүн сапатын жогорулатууга, атап айтканда, окуу китептерин сатып алууга, бардык мектептерде интернетке жеткиликтүүлүктү камсыздоого, гендердик теңчиликти жана көп тилдүү билим берүүнү илгерилетүүгө багытталган",- деп айтылат маалыматта.