Министрлик Надира Нарматованын тууганынын жумушка алышын айтканы боюнча үн катты

Саламаттыкты сактоо министрлиги Жогорку Кеңештин депутаты Надира Нарматова менен саламаттыкты сактоо министри Алымкадыр Бейшеналиевдин сүйлөшүүсүн боюнча комментарий берди.

Буга чейин 24.kg агенттигинин журналисти депутат менен министрдин сүйлөшүүсүн видеого тартып алган. Анда Нарматова Алымкадыр Бейшеналиевден тууганын жумушка орноштурууну суранган.

Өз кезегинде министрлик депутат менен министрдин бул сүйлөшүүсүндө республиканын саламаттыкты сактоо тармагындагы медициналык кадрлардын жетишсиздиги талкууланганын айтты.

"Чындыгында саламаттыкты сактоо тармагында медициналык адистердин жетишсиздиги бар. Жаш адистердин кайрылуулары көп болот. Мындай учурларда алардын суроо-талаптарын кароо үчүн алар саламаттыкты сактоо уюмдарына жөнөтүлөт. Мындан тышкары, Улуттук кардиология жана терапия борбору жалпы хирургия боюнча адистерди талап кылбайт", - деп түшүндүрүштү министрликтен.

Ошондой эле министрлик мекеме жумушка орношууга түздөн-түз таасир эте албай тургандыгын кошумчалады.

"Саламаттык сактоо министрлиги жумушка орношууга түздөн-түз таасир эте албайт, саламаттыкты сактоо уюмдарынын жетекчилери жумушка кабыл алууда ар бир учурда квалификациялык талаптарды, мисалы, адистин дипломунун, стажынын жана иш тажрыйбасынын болушун эске алат", - деп кошумчалашты Саламаттыкты сактоо министрлигинен.