"Түкүр бетине". ИИМ балдарын жана аялын сөккөн жаран боюнча билдирүү таратты 

Социалдык тармакта таралып жаткан видео боюнча тиешелүү чаралар көрүлөт. Бул тууралуу бүгүн, 12-октябрда ИИМден билдиришти.

Маалым болгондой, 11-октябрда социалдык желесине эркек киши балдарын тилдеп жаткан видео тараган.

Анда видеодогу адам балдарын сөгүп, "Мени ата дебегиле" дегенин көрүүгө болот. Ошондой эле ал уулунан кызын тебишин сураган.

"Чачынан тарт, бетине түкүр" деген ал уулуна.

Бул видео боюнча Ош облустук ички иштер башкармалыгы аталган жарандын өздүгүн аныктап, ал Кара-Суу районунун тургуну 1987-жылы туулган М.М. экендиги такталган.

Тактоо иштеринин жүрүшүндө жогорудагы киши Орусиянын жараны болот. Мурдагы жубайы экөөнүн ортосунда 1 кыз, 1 уулу бар, алар менен учурда чогуу жашабагандыгы маалым болду.

Ал эми тартылган видео тасма ушул жылдын апрель айында Орусиянын аймагында жүргөн учурда тартылгандыгы такталды.

Бул окуя боюнча тиешелүү чаралар көрүлөт.