Кытай Израилди эл аралык мыйзамдарды бузду деп айыптады

Израилдин аракеттери өзүн коргоонун чегинен чыкты жана алар Газа тилкесинин тургундарын жамааттык жазалоону токтотуусу керек. Бул тууралуу Кытайдын тышкы иштер министри Ван И Сауд Аравиянын тышкы иштер министри Фейсал бин Фархан менен сүйлөшүүсүндө билдирди деп жазат EADaily басылмасы.

Кытайдын тышкы иштер министри Ван И

"Кытай карапайым калкка зыян келтирген бардык аракеттерге каршы жана айыптайт. Анткени алар адамдык абийирге каршы келет жана эл аралык укуктун негизги нормаларын бузат", - деп билдирди Кытайдын Тышкы иштер министрлигинин дипломаты.

Ошондой эле ал Израил эл аралык коомчулуктун жана БУУнун баш катчысынын чакырыктарына кулак салышы керектигин белгилеп, бардык тараптар согуштун ырбашына алып келе турган аракеттерден алыс болуп, тез арада сүйлөшүү үстөлүнө кайтуулары керектигин кошумчалады.

Израиль менен палестиналык ХАМАС кыймылынын ортосундагы согуш 7-октябрдан бери уланууда. Израил ХАМАСтын чабуулунан 1300дөн ашуун адамы өлгөнүн кабарласа, Палестина Газаны аткылоодон 2200дөн ашык киши мерт кеткенин билдирүүдө.

Учурда Израиль Газа тилкесине электр жарыгын жана суу берүүнү токтотуп, толук блокадага алган. БУУ жана дүйнөнүн бир нече өлкөсү Израиль бийлигинин аракеттерин сынга алууда.