Акыйкатчы институту Ислам кызматташтык уюмуна кирүүгө ниеттенүүдө

Акыйкатчы институту Ислам кызматташтык уюмунун Акыйкатчылар Ассоциациясына (ИКУ АА) кирүүгө ниеттенүүдө. Бул тууралуу мекеменин басма сөз кызматынан билдирди.

Маалыматка ылайык, Стамбулдагы ассоциациянын Башкы ассамблеясынын жыйынына акыйкатчы Жамиля Жаманбаева катышкандан кийин Кыргызстандын Акыйкатчы институту аталган альянска кирүү чечимин кабыл алды. Аталган жыйынга Кыргызстан байкоочу катары катышкан.

“Кыргызстандын Акыйкатчы институту Ислам кызматташтык уюмунун Акыйкатчылар Ассоциациясынын ишмердүүлүгүнө кызыгуу менен байкоо салып турат, анткени Кыргызстандын көпчүлүк жарандары ислам динин тутунат. Жарандардын диний эркиндиктеринин укуктарын коргоо Кыргызстандын Акыйкатчы институтунун приоритеттүү багыттарынын бири болуп саналат. Альянска кирүү менен Кыргызстандын Акыйкатчы институту ИКУ ААнын аянтчасында жарандардын дин тутунуу эркиндигин коргоо боюнча өзүнүн позициясын билдире алат”, - деп эсептейт Жаманбаева.

Азыркы учурда институт Ислам кызматташтык уюмунун Акыйкатчылар Ассоциациясына кирүү үчүн расмий кайрылуу даярдоодо.

Ислам кызматташтык уюму - эң ири жана эң таасирдүү расмий мусулман өкмөттөрүнүн расмий уюму. Азыркы учурда ал жалпы 2 миллиард калкы бар 56 өлкөнүн башын бириктирип турат. Штаб-квартирасы Сауд Аравиясынын Жидда шаарында жайгашкан.

Кыргызстан 1992-жылы 1-декабрда Ислам кызматташтык уюмуна мүчө болгон. Кыргызстандын Акыйкатчы институту аталган уюмдун байкоочусу болуп эсептелет.