Кыргызстан Ооганстан элине гуманитардык жана медициналык жардам көрсөттү

Президент Садыр Жапаровдун тапшырмасы менен Ооган элине гуманитардык жардам көрсөтүлдү. Бул тууралуу бүгүн, 18-октябрда Улуттук коопсуздук мамлекеттик комитетинен билдиршти.

Маалыматка караганда, 4-октябрдан 16-октябрга чейин Эмгек, социалдык камсыздоо жана миграция министрлиги, Саламаттыкты сактоо министрлиги, Айыл чарба министрлиги, ТИМ жана ӨКМдан турган гуманитардык экспедиция Бадахшан провинциясына, ошондой эле Ооганстандын Кичи жана Улуу Памирине кургактык транспорту менен 2 тоннага жакын дары-дармектердин жана ветеринардык препараттардын партиясы жеткирилди.

"Кыргызстандан педиатр, терапевт, стоматолог, гинекологдор барышты. Алар бийик тоолуу шартта, 4 миң 200 метр бийиктикте үч күн ичинде 600дөн ашык муктаж болгон жергиликтүү тургундарды медициналык кароодон өткөрүштү жана дарылашты. Ветеринарлар эпизоотиялык абалды изилдеп, 700дөн ашык бодо малды жана майда малды эмдөөдөн өткөрүштү. Ошондой эле жергиликтүү тургундарга ветеринардык дары-дармектер берилип, аларды ар кандай оорулардын алдын алуу үчүн колдонуу боюнча окуулар өткөрүлдү", - деп айтылат маалыматта.

Белгилей кетсек, гуманитардык миссиянын жыйынтыгы боюнча ооган бийлиги жана Ооганстанда жашаган этникалык кыргыздар президентке, министрлер кабинетине жана Кыргыз элине көрсөткөн ар тараптуу камкордугу үчүн ыраазычылык билдирип, бул жардамды тарыхый деп баалашты.